ചില ഇരുണ്ട ചിന്തകൾ

ഇരുട്ടിൻറെ ഏകാന്തതയിൽ നിന്നും പുറത്ത് കടക്കുവാൻ ഞാൻ അതിയായി ആഗ്രഹിച്ചു.പക്ഷെ,പുറത്ത് വന്നപ്പോൾ ഞാൻ പിടിക്കപ്പെട്ടു,കാരണം ഞാനൊരു കള്ളനായിരുന്നു.

****************************************************************************

ഉറങ്ങാത്ത രാവുകളും ഉറക്കം തൂങ്ങിയ പകലുകലുമാണെന്റെ ശാപം.

****************************************************************************


ഇരുട്ടിൽ നിന്നും രക്ഷപ്പെടുവാൻ ഞാനൊരു ചൂട്ട് കത്തിച്ചു.എന്നിട്ടതെന്റെ നെഞ്ഞിലേക്കിറക്കി വച്ചു .മനസ്സിൽ പ്രകാശം പരക്കട്ടെ ആദ്യം !

*****************************************************************************
ഉറക്കത്തിൽ നിന്നെയുന്നേറ്റു ഞാൻ ചുറ്റുപാടും നോക്കി.എല്ലാവരും നല്ല ഉറക്കത്തിലാണ്‌ .മറ്റുള്ളവരുടെ ഉറക്കം കളയാതിരിക്കാൻ ഞാനും കണ്ണടച്ചു കിടന്നു.

പ്രതിരോധം

സമൂഹത്തിലെ തിന്മകൾക്കെതിരെ പ്രതികരിക്കുന്ന വാളാകാൻ ചെറുപ്പം മുതലേ ഞാൻ കൊതിച്ചു.

പക്ഷെ,സ്വയം പ്രതിരോധിക്കുന്നതിനായി ജീവിതകാലമത്രയും രണ്ടു കയ്യിലും പരിചയേന്തി നിൽക്കേണ്ടി വന്നതിനാൽ എൻറെ ആഗ്രഹം ഒരിക്കലും പൂവണിഞ്ഞില്ല .

തലമുറ

മകനെ കൂടുതൽ ശ്രെദ്ധിക്കുന്നതിനായി അച്ഛൻ വേറെ മക്കൾ വേണ്ടെന്ന്‌ വച്ചു .
സ്വന്തം മകനെ കൂടുതൽ ശ്രെദ്ധിക്കുന്നതിനായി മകൻ  അച്ഛനേയും 

ആത്മഹത്യ

ഗർഭസ്ഥ ശിശു പെണ്കുഞ് തന്നെയെന്ന് ഡോക്ടർ വിധിയെയുതി.വീട്ടുകാർ അവളെ ശകാരം കൊണ്ട് മൂടി,ഭർത്താവ് വയറ്റത്ത്  തൊഴിച്ചു.
അമ്മയുടെ ജീവൻ രക്ഷിക്കുന്നതിനായി കുഞ്ഞ് പൊക്കിൾക്കൊടി കഴുത്തിൽ മുറുക്കി ആത്മഹത്യ ചെയ്തു.

ചൂരൽ

ഹോം വർക്ക്‌ ചെയ്യാത്ത ചെയ്യാത്ത കുട്ടിയെ ശിക്ഷിക്കാൻ ചൂരൽ കൊണ്ടു വരാൻ അധ്യാപകൻ ക്ലാസ്സ്‌ ലീഡറെ പറഞ്ഞയച്ചു.
ചൂരൽ പൊതിഞ്ഞു കൊണ്ട് വന്ന പത്രത്താളിലെ വാർത്ത‍ അധ്യാപകൻ ഒന്ന് കണ്ണോടിച്ചു."വിദ്യാര്തിയെ മർദിച്ച അധ്യാപകൻ അറസ്റ്റിൽ"
അധ്യാപകൻ ചൂരൽ കൊണ്ട് ചുവരിലെ മാറാല തോണ്ടി.

സഹതാപം

റോഡിൽ ഒരു ആൾക്കൂട്ടം .ചുറ്റുമുള്ളവരെ വകഞ്ഞു മാറ്റി ഞാൻ ഉള്ളിൽ കടന്നു.അവിടതാ ഒരാൾ ദേഹമാസകലം രക്തത്തിൽ കുളിച് കിടക്കുന്നു,ബൈക്ക് ആക്സിഡന്റ് ആകണം.
ഞാൻ ചുറ്റും കൂടിയവരിലേക്ക് നോക്കി,ആളുകളെല്ലാം വീണുകിട്ടിയ അവസരം ക്യാമറയിലൂടെ ഒപ്പിയെടുക്കാനുള്ള ശ്രെമത്തിലാണ് .
എനിക്കെന്നോടു തന്നെ എന്തെന്നില്ലാത്ത വെറുപ്പ് തോന്നി.'ഉടൻ തന്നെ ക്യാമറയുള്ള ഫോണ്‍ വാങ്ങണം 'ഞാൻ മനസ്സിൽ തീരുമാനമെടുത്തു 

തെളിവുകൾ

സ്ത്രീപീഡനക്കേസിൽ പ്രതികളായവരെ കോടതിയിൽ ഹാജരാക്കി.ജീവപര്യന്തമോ തൂക്കുകയറോ എന്ന് തീരുമാനിക്കുന്നതിനായി കോടതി രണ്ട് ദിവസത്തേക്ക് പിരിഞ്ഞു.
അടുത്ത ദിവസം പ്രമുഖനായൊരു മന്ത്രിയും കുറ്റകൃത്യത്തിൽ പ്രതി ചേര്ക്കപ്പെട്ടു.വ്യക്തമായ തെളിവുകളുടെ അഭാവത്തിൽ കേസ് തള്ളിപ്പോയി.

വിശ്വാസം

അമ്മ തറവാട്ടിൽ പോയ ദിവസം വീട്ടിൽ അച്ഛ്നും മകളും തനിച്ചായി. ഭൂതങ്ങളിൽ നിന്നും പിശാചുക്കളിൽ നിന്നും അച്ഛൻ തന്നെ സംരക്ഷിക്കുമെന്ന് മകൾ വിശ്വസിച്ചു.
പിറ്റേന്ന് മുതൽ, സ്വന്തം അച്ഛനിൽ നിന്നും തന്നെ ആര് രക്ഷിക്കുമെന്ന ചോദ്യത്തിന് ഉത്തരം തേടി അവൾ അലഞ്ഞു.

ബാധ്യത

എന്റെ എടുത്ത് ചാട്ടത്തെക്കുറിച്ച് ഭാര്യ ഒരുപാട് പരാതി പറഞ്ഞു .ഞാനും ഒട്ടും വിട്ടുകൊടുത്തില്ല,അവളുടെ ഉത്തരവാദിത്ത ബോധമില്ലായ്മയെ ഞാനും വിമർശിച്ചു .
നിരാശയോടെ ഞങ്ങൾ ചുവരിനോട് മുഖം തിരിഞ്ഞിരുന്നു. ഒരു നിശ്വാസത്തോടു  കൂടി ഞാൻ സ്കാനിംഗ്‌ റിപ്പോർട്ട്‌ ഒന്നുകൂടെ എടുത്ത് വായിച്ചു.
"അതെ,അവൾ വീണ്ടും ഗർഭിണിയാണ് ...."

മൂടുപടം

പുരസ്കാര വേദിയിൽ ഒരു രാജാവിനെപ്പോലെ ഞാനിരുന്നു. പ്രാസംഗികൻ എന്റെ സാഹിത്യത്തെ വാനോളം പ്രശംസിക്കുകയാണ്. 

ഞാൻ മനസിൽ ഗൂഡമായി മന്ദഹസിച്ചു.

"ഹേ ,വിഡ്ഢികളേ ,ജീർണതക്കെതിരെ പ്രതികരിക്കുന്നതിനുള്ള എന്റെ ഭീരുത്വത്തിന് ഞാൻ നൽകിയിരിക്കുന്ന മൂടുപടം മാത്രമാണ് എന്റെ സാഹിത്യം!"